Ket iti dangadang a lumtuad dagiti agibit a karasaen, dagiti nakapatig a karasaen, dagiti pimmurawen a karasaen. Ket iti dangadang, agsubli ti kararua ni Ina Wayawaya, lugananna ti kararua ti kada kaputotan, parmekenna dagiti nakem a sinabidongan dagiti puraw a bannawag ken puraw a malem ken ganggannaet nga angin, tagikukuaenna manen dagiti panunot ken anges ken tagainep dagiti annak ti ili ken pagilian. Ket iti dangadang met agsubli dagiti Bannuar, mabuniaganda amin iti sirok ti latok, masaka amin nga ayatda manipud iti pagisaldaan ti masakbayan tapno maimula amin dagitoy iti barukong ken sellang ken panagal-al ken panagalimpatok iti katengngaan ti aldaw ken katengngaan ti rabii, iti katengngaan ti gawat ken tig-ab tapno mapasamak manen ti panagdara ti ubing nga init ken ti kabus. Agtedted ti ubing a dara iti antigo a talon dagiti darepdep ni kinawayawaya ket amin a makamurmuray, amin a makariing, asaenda dagiti tadem, iwanaswasda dagitoy iti estranghero nga angin ket sulnitanda amin a kararag kadagiti lumlumoten a dios ti kinalinteg. Iti dangadang agsubli met ti kulibangbang mangikot kadagiti lagip, tagikukuaenna ti sardam ken ti kaltaang, riputenna dagiti darikmat tapno maipasngay ti balligi, tapno matungpal ti tagainep, tapno manen ken manen ket mangngegan dagiti lallay ken duayya a mangirakurak iti wayawaya, mangipakdaaw iti pannakatungpal ti naimbag a damag iti ngudo dagiti daraan a tadem.
