Nakain-inaka nga aramid
ti panagabel iti daniw
iti Mountain Cloud.
Wenno ti panangiyebkas kadagiti silaba
ti ir-iruken a rikna a rikna met
dagiti rumuk-at a saripatpat
tapno iti kandado dagiti ritmo
ket ti kantata dagiti napuskol nga angep
iti payegpegen nga agpatnag.
Ditoy, iti isu met laeng a siudad
dagiti saleng a maila iti arakup,
ditoy a naitukit ti kakaisuna
a daniw a mangallangon
iti inaradasda nga anaraar
ti maipasngay a bigat.
Adu dagiti kuriro a managlilipat
kas iti kaadu dagiti baniaga nga alimuteng
gapu iti ili a kamalala ti basingbasing
ngem iti kadaklan ti Mountain Cloud
ket ti tallaong a mannakigubat.
Ditoy, iti presensia dagiti mannaniw
iti kitakit, isuda a makaammo
iti solitudo ti nalabaga nga alimpatok
dagiti linabag, ket ti panangalawko
iti riknak iti tapaw ti agragut nga anangsab.
Ditoyko nga isibbo dagiti amin a gartem,
ipasindayag kas iti baro a kawes
tapno kadagiti panid ket ti mapnek
a duayya dagiti mangrukrukod a gagem.
Iti rapas a palad ti mannurat
ket ti panaginnala ti umuna a sipnget
ken ti maudi a lawag.
Ditoy nga agrusing ti daniw,
iti bunubon dagiti agkabannuag
a linabag, ditoy, iti Mountain Cloud.
24 Agosto 2016/HNL
No comments:
Post a Comment