Pammati iti Agdan ti Campus Center . Dandaniw manipud iti Signos.

Pammati iti Agdan ti Campus Center

(Gapu iti maysa a buya iti uneg ti kampus ti UH Manoa, Oktubre 13, 2016)

Ita nga aldaw ti Oktubre trese,

iti arinunos dagiti mangwaksinto koman

a leddaangmi, ket ti anninaw sakbay

ti ligsay. Jueves ita, sa Viernes,

ket inton bigat ket ti kari a panaglaing,

ti virtud ti kararua iti labes ti Nangisit a Sabado

sakbay ti Kuaresma.

Adda ditoy ti maysa a lalaki, nabaneg,

barbangisit iti baritono a boses,

ti bassit a mikrofono iti ngiwngiw,

ti agpulpuligos a karatula

iti makannawan nga ima

kas iti Ama sadi langit

wenno ti Moses a nakaiggem iti tableta

dagiti dekreto ti panamati.

Ngem karkarna dagiti tulag

iti karatula a puraw, ti immakulada

a saksi ti isip nga awaaw:

Mortal a basol ti panagpapatay.

Mortal a basol ti panagtakaw.

Mortal a basol ti homosexualidad.

Mortal a basol ti pannakiapid.

Mortal a basol ti agsalsalawasaw.

Awan ditoy ti il-iliwen a mabasa:

A kardinal a basol ti umuusga.

Ketdi ket ti parupa a kasaba:

Ni Jesus laeng ti salakan ti kararua.

Ita nga aldaw, malagipko ti agsarua,

Agalidukdok kas iti panagpurga.