Ken Dr Julius Bajet Soria: gapu ta ibabaetna dagiti aramid iti wayawaya.
1.
Saan nga immay ti salaksak, adingko.
Ket kas iti mannanakaw, immay ti kanibusanan
Dagiti anges, ket iti dayta a nasapa nga aldaw,
Iti kangitingan ti turog ken pannakalukag,
Ket ti inka ipapanaw tapno sumangpetka
Iti sabali a panawen, sabali a disso,
Sabali a lubong iti bangir ti karayan ti biag
A mortal. Mabatikami kadagiti ib-ibitmi.
Mabatikami kadagiti lagipmi
Ti kaaddam iti agnanayon a disoras
Ti kaawan a kaadda met laeng
Kadagiti aripapa a no sumangbay ket nagabay.
Awan natay a kayo a babatayan ti salaksak
Ta ditoy, iti sagrario dagiti maulila a siled
Ti hospital ket ti namnama koma
Nga iti anaraar ket ti katawam, kas iti,
Kas idi punganay, kas kadagiti kalat
Para iti ili nga iti pusom ket inakom
A kas partaang ti ipapanaw
Tapno daytoy nga ili ket iti eternal
A pannakigubalmo kadagiti suero, antibiotiko,
Dara, adu pay nga am-amangaw
Ket ti ibabangon manen kas iti panagungar
Iti maikatlo nga aldaw.
2.
Saanak a namingga iti text,
Ket iti panagbaringkuas
Ket ti mensaje ti panagkitakit,
Ti mangsirit manen iti musot
Nga ag-agekan ti linnaaw,
Ti mangapresiar iti ibabangon
Ti daga manipud iti naunday a kalgaw.
No comments:
Post a Comment