Signos, 1. Dandaniw. For Dr Julius Soria.

SIGNOS, 1

[Para kenka, adi a Dr Julius Soria]

Saanka a napasag

a pinasag dagiti bangungot,

adingko, kabsat, kadua.

Pinasagnakam ti beddeng dagiti mortal a bagi

kas iti mortal a kararua ngem ti espiritu ti imbag

kas iti lagipmi kenka ket kas iti singising iti amin

nga agsapa. Anaraar daytoy ti dara a kari,

nalabaga, nabiag, pumsuak kadagiti amin

nga urat iti puso ken iti panunot tapno daytoy

ket bisibis iti rekkarekkang a daga, ditoy man ili

a nakaisadsadan wenno iti ili a nakaibatian

ti kakaisuna a kadkadua. Mapangka nga agdaliasat

iti bangir ti bagi ti danum. Awit-awitmo

dagiti amin nga engkanto ti sao

kas iti balikasmo kadakami amin nga inka

pinanawan tapno iti eternidad ti panawen

ket sadiayka nga innakam ikararagan.

Agtanamitimka kadi kadagiti mapaungar a sao,

dagiti mangted kadakam iti namnama

a kasukat dagiti amin a sennaay, danag, aripapa,

limdo, dagitoy amin iti idda dagiti suero ken agas,

iti makasabidong a lua iti ipupusay iti nasapa

a bigat a ti bannawag ket nagabay unay.

Kasukat dagitoy dagiti saning-i, mangngeg man

wenno im-impen tapno ti barukong laeng ti agkuti,

wenno ti agsalloy nga abaga, wenno ti agkuppit

a karirikna tapno aglusdoy dagiti amin a regta,

agsalakan dagitoy kadagiti anghel dagiti tagainep

a sadiay ket kaduadaka. Iti sumuno a lubong

ket ti arkos a bullalayaw, sika a nagawan

tapno agsubli kadagiti amin nga ipupusa,

sika a pimmusay tapno agungar kadagiti amin

nga agkabannuag kadagiti nasged a tarigagay.

Imbatim, kabsat nga adi dagiti tulag,

baro ken duogan, ket iti isemmo nga adda

iti kanvas ti parparmata ket ti agnanayo a sika

a kadagiti aldaw ket ti daton nga arapaap.

Sagpaminsan a dumteng dagiti aripapa,

ngem ania ngarud ket iti law-ang dagiti kas kenka

ket ti manglaglagip a dakami,

aminkami nga imbatim tapno agatang,

agayam iti pannangan, sumaren dagiti amin a leksion

a panarita ti panaglangan kadagiti ragragsak.

Timudenmi dagiti sumuknal a timek

tapno iti tangatang nga ayan ket ti bilinmi

kenka a dinakam liplipatan. Ketdi, ibagam

kadagiti bituen a kaadayuan a sadiay ti universo

nga iti rumbeng a panawen ket ti pagsasarakan.

Immortal dagiti kaasim,

ket ngarud, adi a kabsat, kabsat a kadua,

laglagipem ti uppat a kararuam.

Itedmi kenka ti sensilio tapno bayadam

ti mangitunda kenka iti sabali a biag,

sabali ta sadiay ket adda pammakawan.