Bagio idi ti Ayatna,
1
Maysa a bagio idi ti ayatna,
kas iti wanesnes ti angin a dumuklos
kadagiti turod, sa ti bangkirig ti bantay.
Idiay kami nga agsala iti fandango ni rugso,
ti sakak iti sakana iti di mabilang a panagsikkusikko
dagiti agkarayam nga ima tapno iti rangkis
dagiti kinataomi a dua ket agsabat
a kas tudo, siamsiam koma tapno ti nepnep
ket sumuko dagiti kararuami a dua.
Iti alimpapatok ti maiparit nga ayat
ket ti signal a kangatuan,
signal singko a di lablabsan.
Ta adda ta adda gayebgeb
kadagiti barukong a lemmesen ti layus
tapno kaduami dagiti gabat nga agtunglab
agsalakan iti alluyo dagiti maabbedan a dissuor
kadagiti sellang, gumawgawa kadagiti amin
nga aribengbeng, agar-araraw iti pannakaruk-at
tapno allilawenmi ti sabali a signal
dagiti ribo nga al-al a mapadso.
Sungbatak, diputado, ti saludsodmo.
Pito a tawen a dinarupmi dagiti amin a rikna
tapno ti kammayet dagiti bagi ti agari,
lamulamo dagitoy iti mangul-ules a rabii.
Nagplanokami kadi kadagidi sardam
a ti arak ti pangontra iti talimudaw
tapno iti panagrasuk ti pus-ong
ket ti agngangabit
nga anangsab, duakami iti rawis,
duakami iti aringgawis
dagiti amin nga isusuko?
Diak masinuno, apo diputado.
Kas met kenka, iti panangiduron kadagiti leddaang
iti sibabalo a barukongmo,
kas met kenka, inwalinmi amin a bakabaka
tapno iti areng-eng dagiti kaltaang ti rabii
ket ti agur-uray a napuyatan nga agsapa.
Madaripespes amin a madaripespes.
Iramanmon ditoy, apo diputado dagiti regget
ken pudno ken panaginkukuna, dagiti makunes
a lino, dagiti pungan a saksi, dagiti idda
a sappuyot dagiti mabagio a bagi. Anian!
Manipud signal uno agingga iti kapigsaan
nga saplit ti angin ti angin kadagiti rikna
nga agkaribuso, agareng-eng kadagiti allawig
nga agpasalakan iti appupo! Anian!
Ngem itan, iti ukom dagiti pannuok
nga iti agmatuon ket ti ulbod,
aggibus iti rugi iti isu met laeng a sulisog.
Inayatka, sika a babai. Intampok
iti trono dagiti palludip nga iti panaggiddan
nga agsainnek ket ti nagpaiduma met
a pannakapnek. Umapal dagiti suripet,
nga iti panangidagel iti lawag ti sipnget
ket ti met laeng ayek-ekta nga agsarsariwawek.
Ngem itan ti salogan iti bantay.
Sadiayta iti pantok idi, ket idiay
a binukelta amin a pulso ti apagkidmat,
ti pusom iti kararuak, ti espiritum
iti agragut ta agragut latta a seseggaak.
Binirbirokka kadagiti di makaidna
nga iddak, ti agur-uray nga ules
a mangabbong iti silalabus a ragsak.
Itan ket ti signal uno, ket inton bigat
ket ti agdadata a kalak-amak, desertor
iti daytoy peregrino a rikna, tumallikod
iti agtawtawataw a sapatata iti maysa ken maysa.
No comments:
Post a Comment