Monologo ni Ronnie Dayan, ti Kaayan-ayatna nga Agayat iti Signal Cinco

Monologo ni Ronnie Dayan, ti Kaayan-ayatna nga Agayat iti Signal Cinco

[N]agkakalabuan na kami ni ma’am. Kesyo hindi na daw kami masaya sa pagsasama naming (sic), lagi kasing bangayan, at laging nag-aaway kami. Ronnie Dayan, in R. J. Dioquinio, “Dayan: I slapped De Lima when I found out about new boyfriend,” GMA News Online, 24 Nov 2016.

Sika man ti maagawan iti ayat,

sika nga iti kaano man ket dimo

impato a pagrukbaban ti nadaeg

a musa a kas ken ni madam.

Ma’am, dayta ti awagko kenkuana idi,

ngem no dumteng ti aldaw, padasekton

a kalipatan, ti mutia nga inay-ayat

iti baet dagiti ringgor ti ili nga agsasamusam.

Adda baro nga ayatna, ti hagad.

Ket kunak kenkuana, ibusennakam kadi,

dakami a naitudeng a parabantay iti anninawan

tapno dagiti agpadaka a rabii ket dida magammatan,

ikarsel kadagiti ginget, itapkal kadagiti sawang

tapno dayta aprosko kenka, sika a madam,

ket ti karayok nga awanan iti nagan?

Sinubalitak ti ayatmo.

Impatok met dayta nga ayatko iti ili,

siak a kadagiti sulsulinek ket nagarapaap.

Isut’ gapuna a nagsuldadoak, madam,

tapno iti pistola dagiti arapaap ket ti turay

nga adda koma kaniak.

Awan kastoy kadagiti kinelleng,

peksman, mabartek man ti tao wenno saan.

Ania koma ti adda iti ngudo ti witiwit,

iti nguso ti arado no di ti pannakabalukag

ti agrekrekkang a daga kas iti panangbalukagmo

iti barukong nga iti kaawan iti bukod nga idda

ket ti arasaasmo kaniak, siak a kas iti bingkol

ket pinidutmo, anian!

Asinno koma ti di maragsakan iti panangisakibutmo

kaniak, siak a kadagiti datdatlag a rabii

a kas suldado iti kalkaltaang

ket ti namnama iti apagapaman?

No apay a nagkurus dagiti dalanta, madam,

diak maung-ungpot a panunoten. Ammok

dagiti palimed dagiti danum a naabbedan,

iti man surong wenno iti puyupoyan, ket kas kenka,

binirokko dagiti aribengbeng, imbulosko dagiti apres

nga apres iti sellang tapno koma iti basbas ti tangatang

ket makadua manen ken manen iti labes ti apagapaman.

Makikiak kadagiti saom, sapata a kas iti agnanayon.

Awan ressat dagitoy a panimpla iti pait nga ammok,

daytay maraamargoso a raman nga iti pannakapuot

ket ti gumawgawawa a kaipapanan.

Uray sadinno nga infierno, sindadaanak a kenka

sumurot. Uray sadinno a pakigubalan la ket ta

kaduaka kadagiti alikuno, sadiayta, mata daytoy,

iti batiwerwer ti mabartek a panagpuligos dagiti bagita,

siak iti sika, sika iti siak iti maymaysa nga idda,

kaatagka ken dagiti balikasmo nga addaan iti diro

kaatagkan, ti ulom iti brasok kalpasan ti balang

a panaginnala dagiti saanen nga estranghero a kararuata.

Pito a tawen a saan nga asi-asi.

Pito a tawen, kas iti mistiko a numero dagiti bangkay

wenno dagiti Judio, agadu dagitoy iti texto ti garagakta,

iti panangsimsim iti arak iti maymaysa a kopita,

kas iti panangraman iti dara ti mesias nga ita,

iti kada agsapa, ket lidokenta, nanamen

iti karabukob, baan a sadiay ket agbayag bassit,

bay-an nga agindeg iti apagdarikmat dagiti panagmaymaysa

a madagdagullit, santo iti umno a kanito ket ti panangwayawaya

iti daytoy tapno agkaramayam iti rusok.

WPH/

25 Nov 2016